LAOAG CITY – Balligi a naisayangkat ti Automated Counting Machine Nationwide Roadshow ditoy siudad ti Laoag.
Daytoy ti naragsak nga inpakaammo ni Atty. Julius Harvey Balbas, Election Officer ti Commission on Elections – Laoag.
Segun ken ni Atty. Balbas, daytoy ket paset ti pannakaipadalan iti testing ti Commission on Elections iti Automated Counting Machine kas panagsagsagana para iti 2025 National and Local Election.
Inbatadna a babaen iti daytoy ket naipakita iti publiko no kasano a mausar ti Automated Counting Machine kadagiti botante.
Inlawlawagna a ti Automated Counting Machine ket baro a makina maidasig iti Vote Counting Machine a nausar kadagiti naglabas nga eleksion.
Kunana a ti Automated Counting Machine ket naaramid manipud pay iti pagilian a Korea.
Mainaig iti daytoy, inrakurak ni Atty. Balbas a naragsakan dagiti nakipaset iti daytoy nga aktibidad gapu ta naimatanganda mismo ti al-alisto a pannakaibasa dagiti maipadalan a balota iti las-ud laeng ti tallo a segundo.
Naammoan a dagiti nakipaset iti nasao nga aktibidad ket dagiti pannakabagi manipud kadagiti national government agencies, uniformed personnel, departmet heads, empleado ti lokal a gobierno ken dagiti barangay officials ditoy siudad.
Malaksid iti daytoy, pormalen nga inruar ti Commission on Elections – Laoag ti Certified List wenno ti listaan dagiti kualipikado a kandidato para iti eleksion inton sumaruno a tawen.
Iti kina-Mayor ket agbinnalubal da Konsehal James Bryan Alcid manipud iti Nacionalista Party ken ni Mayor Michael Marcos Keon kas Independent Candidate.
Iti kina-Bise Mayor ket aglaban da Vice Mayor Rey Carlos Fariñas manipud iti Partido Para sa Demokratikong Reporma ken ni Konsehal Handy Lao iti Nacionalista Party.
Kabayatanna, adda ti 18 a kandidato nga aglalaban para iti Konsehal ditoy siudad ti Laoag.
