LAOAG CITY – Adda iti natalged a sitwasyon dagiti sumagmamano nga overseas Filipino worker iti pagilian a Kuwait iti baet ti mapaspasaran ti lubong a coronavirus pandemic.
Iti pannakiuman ti Bombo Radyo Laoag kenni Mrs. Lilibeth Valdez Alegado, OFW iti Kuwait ken tubo ditoy Ilocos Norte, kuna na nga awan pay ti naamuan na a pimmusay gapu iti COVID-19 ngem adun dagiti nagpositibo.
Inbatad na a naiget iti panagpatrolya dagiti otoridad iti rabii gapu iti sursuruten da a curfew hours manipud iti alas-singko ti malem agngudo met iti alas-kuatro ti parbangon.
Segun kenni Alegado, saan a makastrek dagiti awan ti suot na a face mask, gloves ken ti ID a maipakita kadagiti otoridad.
Kuna na nga adda ti gundaway a maibus dagiti produkto kangrunaan iti bread iti merkado wenno kadagiti supermarket.
Innayon ni Mrs. Alegado a nasayaat dagiti ammo na kenkuana.
