LAOAG CITY – Awan dagiti residente a mapalubusan a rumuar kadagiti nagduduma a barangay ditoy siudad ti Laoag iti aldaw ti domingo kabayatan ti Enhanced Community Quarantine (ECQ).
Daytoy ti inbatad ni Atty. Ferdinand Calumag, ti legal officer ditoy siudad kabayatan ti pannakitaripnong ni Mayor Michael Marcos Keon kadagiti kapitan idi kalman.
Inlawlawag ni Calumag a napagnunumoan a mapaserran pay laeng amin dagiti business establishments iti aldaw ti domingo para iti disinfection.
Inpakaammo na a kabayatan nga adda iti ECQ ti siudad ket saan pay laeng a mapalubusan a sumrek dagiti aggapo iti sabali nga ili malaksid kadagiti agpaagas, agturong iti bangko ken dagiti APOR.
Patien na nga ada ti paggatangan iti nagduduma nga ili kadagiti kasapulan iti uneg ti balay isut gapu na a saanen a masapol a sumrek ditoy siudad.
Innayon na a kas paset ti pannaipatungpal ti ECQ ket masapol a maysa laeng a talipapa ti maipalubos a maiyestablisar idinto a saan a mapalubusan nga aglako dagiti ambulant vendor.
Kabayatanna, inkari ni Mayor Keon a maikkan ti gunguna ti barangay a makaipababa ti bilang ti kaso ti covid-19 ditoy siuad.
