LAOAG CITY – Inpakaammo ni Barangay Chairwoman Rodalyn Dela Cruz ti Barangay Lagui-Sail ditoy siudad ti Laoag nga awan met pay ti naaw-awatna a report nga adda dagiti kabarangayanna ti makapaspasar ti kinaawan wenno kinakurang ti suplay ti danum iti baet ti panawen ti kalgaw.
Nupay kasta, inbatadna a no adda dagiti gundaway nga agpukaw ti pangal-alaanda ti danum ket mapan makisakdo kadagiti kaarruba dagitoy.
Inlawlawagna nga iti agdama ket awan met pay ti nadagsen a problema a sangsangoenda maipapan iti serbisio ti danum iti barangayda.
Maipalagip a kalikagum ti Sangguniang Panlungsod nga agkiddaw iti Ilocos Norte Water District ken iti Prime Water a maipalawa pay ti mabalin a sakupen ti pakadanonan ti panagsuplayda ti danum ditoy siudad ti Laoag.
Immuna iti daytoy, naammoan a dagiti karaman kadagiti awanan ti suplay ti danum nangruna ita a panawen ti kalgaw ket iti Barangay Lagui-Sail, Barangay Vira, Barangay Salet Bulangon ken Barangay Bacsil.
