LAOAG CITY – Inpetteng ni ABC President George Padre iti ili ti Bacarra nga awan pay ti inaprubaran ti DSWD Regional Office a listaan dagiti nagan a benepisyaryo ti cash for work.
Segun kenni Padre, bayat ti taripnong da iti Liga ket nailawlawag ni MSWDO a maipasa ti project proposal iti Regional Office ken masapol a maaprubaran sakbay a maiyemplementar.
Inlawlawag na nga agpapan ita ket awan pay ti naaprubaran a nagan dagiti agbalin a benipisyaryo ken ti laeng naibilin ket agisubmitir da ti nagan.
Nupay kasta, masdaaw ni Padre gapo ta adda ti barangay iti ili ti Bacarra a nangiyemplementar iti daytoy.
Kuna ni Padre nga awan ti sabali a mapabasol no diket ti kapitan gapo ta isuna ti nangipatungpal ti programa iti laksid nga awan pay ti naaprubaran.
Ummuna iti daytoy, adda ti reklamo dagiti nagtrabaho para iti cash for work program iti Barangay 6 iti nasao nga ili gapo ta saan da pay a naawat ti sweldo da.
