LAOAG CITY – Awan pay ti maestablisar ti PNP-Laoag no siasinno ti responsable iti pannakapalto-paltog ti agnagan ti Harold Joy Daquioag ditoy ciudad ti Laoag.
Nupay kasta, agtultuloy ti imbestigasyon dagiti otoridad seknan ti pannakatay ti nasao a biktima ken rumrumwar a dua nga agnggulo ti kitkitaen dagiti otoridad a motibo ti krimen.
Daytoy ket pakaseknan ti love triangle wenno panagusar ti iligal a droga.
Maipalagip a napalto-paltogan ni Daquioag iti paset ti Brgy. 23 ditoy ciudad ti Laoag apaman a magmagna nga agturong iti tianggi tapno gumatang ti ice ken beer.
Nakumpiskar dagiti otoridad ti 12 a kapsula ti 9MM ken maysa a kapsula ti kalibre 40 a paltog iti nakapsamakan ti pammaltog.
Mainaig iti daytoy, siyam a tama ti paltog ti sinagaba ni Daquioag kalpasan ti inyuswat ni Dr. Renato Mateo, Laoag City Health Officer nga eksaminasyon.
Naamoan a manipud iti siyam a tama ket tallo ditoy ti nagbati a buli ken innem dagiti simmalpot.
Segun ti report, ti nakatayan ni Daquioag ket gapo ti hemorrhagic shock secondary to multiple gunshots wounds.
Maipalagip a ti biktima ket ummunan nga adda ti kaso na mainaig iti panaglabsing ti RA 9165 a napetsaan ti July 12, 2015 nga inparuk-at ti RTC Branch 13 ditoy ciudad ti Laoag.
Kabayatanna, nagtalinaed iti kustudiyar ti PNP-Laoag ti mapapati a live-in partner ni Daquioag a ni Marie Angelique Amor Lanot kalpasan a naalaan ti maipagarop nga iligal a droga iti naiyuswat a panagsukimat iti balay ni Daquioag.
