LAOAG CITY – Awan pay ti napili a baro a Santo Papa kalpasan a nangisit nga asok ti rimuar manipod Chimney iti Sistine Chapel iti umuna a gundaway a panagbotos dagiti 133 a cardinals.
Gapu iti daytoy, namnamaen ti ad-ado pay a panagbotos ti maiyuswat agingga nga awan ti mapili a baro a Santo Papa.
Sakbay a naiyuswat ti conclave ket tunggal maysa kadagiti Cardinal ket nagturong iti sango tapno dakamaten ti oath of secrecy iti Sistine Chapel.
Nagbalin a naiget ti conclave gapu ta awan ti napalubusan a mangitugot ti cellphone ken camera na tapno agbalin a sagrado ti panagpili ti Santo Papa.
Iti pakasaritaan ti Pilipinas ket adda ti tallo a Cardinals a karaman iti conclave ken dagitoy ket isuda Luis Antonio Tagle ti pro-prefect iti Vatican’s Dicastery for Evangelization,; Cardinal Jose Advincula ti Archdiocese ti Manila ken Kalookan kasta pay ni Catholic Bishop Conference of the Philippines (CBCP) president Pablo Virgilio David.
Kalpasan ti pannakaibasa dagiti oath of secrecy ket pinaruwar ni Archbishop Diego Giovanni Ravelli, Master of Papal Liturgical Celebrations, dagiti dadduma a tattao ket dagiti laengen cardinals ti nabati iti Sistine Chapel.
Inserra met ni Ravelli ti ridaw ti Sistine Chapel no sadinno a guwardiyado daytoy dagiti Swiss Guard.
Maipalagip nga adda dagiti sumagmamano a cardinals a mapagpilpilian a sumaruno a Santo Papa ken dagitoy ket isuda Cardinal Peter Kodwo Appiah Turkson ti Ghana,, cardinal Pietro Parolin ti Italya, cardinal Luis Antonio Gokim Tagle ti Pilipinas, cardinal Fridolin Ambongo Besungu ti Congo, Cardinal Robert Francis Prevost ti US, cardinal Matteo Zuppi ti Italy, cardinal Peter Erdo ti Hungary ken cardinal Pierbattista Pizzaballa ti Italy.
