LAOAG CITY – Inbatad ni DepEd Supt. Vilma Eda nga awan ti dakes na no politiko wenno kandidato dagiti nagidonar kadagiti medalya iti graduation.
Nupay kasta, kuna na a saan a mabalin a maulit-ulit a maiyawag ti nagan ti maseknan a kandidato gapu ta maibilang nga adda ti maris politika na no kastoy ti mapasamak.
Innayon ni Eda a sakbay pay a nangrugi ti kampanya dagiti lokal a kandidato ket napagsasaritaan dan daytoy a banag kadagiti school heads ditoy probinsya.
Inpalagip pay ni Eda ti naipalaon iti bibilia a no mangited iti aniaman a banag ket saan a nasken a maiwarwaragawag ti nagan ti maseknan.
Segun pay ken ni Eda, no ado ti maited a medalya iti maysa nga ubing ket saan a masapol a saggayasaen nga iwaragawag ti nagan dagiti nagdonar no di ket iyukkor lattan iti maseknan.
Kabayatanna, kuna ni Eda nga agimbestigar da kadagiti pageskwelaan a naireport iti Bombo Radyo nga arigna puro kandidato iti innala da a donor dagiti medalya dagiti estudyante.
Inpakaammo na a no adda ti mayat nga agreklamo ket nawaya ti siasinno man.
