LAOAG CITY – Kinumpirmaran ni Engr. Jeff Robles, iti Philippine Institute of Volcanology and Seismology ditoy probinsya a fake news ti nagwaras a kaadda ti bulkan iti ili ti Vintar.
Daytoy ket gapu ta rimwar ti impormasyon a ti Bantay Masadsada iti Brgy. Ester iti nasao nga ili ket maipagarup a maibilang a bulkan.
Kuna ni Robles nga awan iti record ti opisina da a bulkan ti nasao a bantay.
Inbatad na a ti laeng kaasetgan a bulkan nga adda iti Norte ket iti Babuyan Claro Volcano.
Inalay-ayan ni Robles iti panagdanag dagiti residente iti nasao nga impormasyon ken awan ti bulkan iti nasao nga ili.
Innayon na a 24 pay laeng ti nakumpirmaran nga aktibo a bulkan ditoy Pilipinas.
Kabayatanna, inpakaammo ni Engr. Jeff Robles, iti Philippine Institute of Volcanology and Seismology ditoy probinsya a nagbaliw ti turong ti angin ditoy probinsya ken iti lugar ti Taal volcano.
Daytoy ti rason a saan a naapektaran ti Ilocos Norte iti panagregreg ti dapo manipud ti nasao a bulkan.
Kuna na a delikado para iti salun-at ti tattao ti dapo manipud iti nasao a bulkan.
Inbatad ni Robles a ti apektaran ti ashfall dagiti asideg a probinsya ti Visayas iti daytoy a sitwasyon kalpasan a nagbaliw ti direksiyon ti angin.
Mainaig iti daytoy, inbunannag ni Robles a posible a rumwar ti lava kadagiti bettak ti daga no addanto pay ti napigsa a gingined a parnuayen ti bulkan nangruna iti uneg ti 14 a kilometer radius
Inpetteng ni Mr. Almond Leaño, mangidadaulo iti MDRRMO iti ili ti Vintar nga awan iti aktibo a bulkan iti ili da.
Kuna na a ti maibilang a hazard iti ili da ket iti panaglayus, panaggedday ti daga, gingined ken bagyo ken awan ti volcanic hazard.
Inlawlawag ni Leaño a ti mount Banguinsuso wenno mount Masadsada ket maiyarngi iti Taal Volcano iti itsura na.
Inbatad na a bantay laeng daytoy ken saan a maibilang a bulkan.
Mamati ni Leaño a naggapu iti wikipedia ti impormasyon a daytoy ket posible a na-edit ken saan nga us-usto daytoy.
