LAOAG CITY – Awan “foul play” na ti pannakabiruken ti bangkay ni Gilbert Malagday y Alvarez, agtawen ti 43, awanan asawa, maysa a mannalon ken residente iti Bgy. Natba iti ili a Bacarra.
Daytoy ti resulta ti nagtultuloy nga imbestigasyon ti PNP-Bacarra ken babaen ti panakitinnulong ni Dr. Manuel Andres, Municipal Health Officer ti nasao nga ili kalpasan a nabirukan a nakatugaw a tengtenglen ti biktima ti barukong na iti waig ti nasao a barangay.
Segun iti PNP, awan ti nakita ni Dr. Andres nga aniaman a sugat ti biktima ken agarup 4 nga orasen ti napalabas a natay kalpasan a nakita dagiti kabarangayan na a da John Jhessel Garcia y Viernes, agtawen ti 22 ken Edwin Paulino y Galiza, agtawen ti 27 , agpada a residente ti nasao a barangay.
Gapu iti daytoy, posible a ti rason a pimusayan ti biktima ket gapu iti heart attack weno Myocardial Infraction.
Maipalagip a nagpakada ti biktima tapno mapan agala kadagiti nabati a pagay dagiti pada na nga agtaltalon ngem saan a nagsubli rason a binirok da daytoy agingga a nakita da iti nasao a waig a nakatugaw ken iggem na ti barukong na.
