LAOAG CITY – Inpakaammo ni PLt. Col. Adrian Gayuchan, ti hepe iti Philippine National Police-Batac nga awan ti makitkita a foul play iti naduktalan a bangkay ti maysa a lalaki iti kabakiran iti Brgy. Bungon iti nasao a siudad.
Immuna iti daytoy, kuna ni Gayuchan a ti biktima ket agtawen ti 43, naasawaan, awanan ti trabaho ken agnanaed iti nasao a barangay.
Inbatad na a naamoan da ti insidente kalpasan nga adda ti dimmanon a report nu sadino a maysa a mapan agala ti salamagi iti kabakiran ti nakakita ti awanen iti biag na a biktima.
Mainaig iti dayoy, kuna ni Gayuchan a basar iti resulta ti eksaminasyon dagiti doktor iti bangkay ket natay daytoy gapu iti acute myocardial infarction ken alcoholic liver disease.
Inbunannag na a daytoy ket agpada iti estorya ti ina ti biktima nu sadino nga inpakaammo na a nabayagen nga agin-inom ti nasanger ti anak na.
Naamoan nga agawid koman ti biktima manipod iti paggi-inuman iti nasao a barangay idi Pebrero 5 ngem saanen a nakadanon iti balay da gapu iti pannakatay na.
Inayun ni Gayuchan a mapatta-patta met nga umabot iti pito nga oras sakbay a nakita ti bangkay iti kabakiran.
Awan metten iti plano ti pamilya ti bikmita a maipadalan iti otopsiya ti bangkay na.
