LAOAG CITY – Adda ti pagsasao a ti panagbabawi ket kanayun a maud-udi.
Nupay kasta, para ken ni Rev. Reynante Vivit iti Assemblies of God iti ili ti San Nicolas ket awan ti maibilang a naladaw a panagbabawi basta pursigido nga agbalbaliw ti maysa a tao manipod kadagiti nagbiddotan wenno nagbasolan na.
Inadmitir ni Rev. Vivit a sakbay a nagbalin a pastor ket ado paylaeng dagiti saan a maiparbeng a naar-aramidan na kas ti panaginom ti arak, panagsigarilyo, ken ti kagrabean ket nasursuro na ti agusar ti maipawil nga agas.
Kuna na pay nga imbes nga uppat laeng a tawen ti panagadal na iti sekondarya ket nagbalin nga innem a tawen gapu iti pannakaisungsongna iti saan a umiso a direksyon.
Inrakurak ni Rev. Vivit a kadakuada nga agkakabsat ket isuna laeng ti kakaisuna nga ages-eskwela iti nagadalan na ti sekondarya isut gapuna a saan nga ammo ti pamilya na dagiti mapaspasamak kenkuana iti dayta a panawen.
Iti baet dagiti saan a napintas ken maiparbeng a maar-aramid idi ni Rev. Vivit ket dimteng ti panawen a saanna a ninamnama nga isu iti in-inot a pagbalbaliwan ti taray ti biagna.
Inpakaammo na a Mayo 13, 1991 ket pimmusay ti ina na ken iti uneg ti siyam nga aldaw a pannakaimansayag na ket ditoyen nga in-inot a naiyasideg iti Diyos babaen kadagiti naruay nga instrumento nga inaramat ti namarsua.
Innayon na a kabayatan ti siyam nga aldaw a pannakaimansayag ti ina na ket adda dagiti papastor a napan nakian-andingay kadakuada ken naibilin kadakuada a masapol a makipartisipar da iti panangikararag iti minatay da.
Inbatad na a daytoyen ti rugi a sinursuro na ti nagkararag agingga a naminpinsan a nalawlawagan ti panunot na ken nautub na no ania ti kayat ti Diyos a pagbalinan na.
Iti agdama ket 30 a tawenen ni Rev. Vitvit nga agserserbi kas maysa a pastor.
