LAOAG CITY – Saan nga irekomendar ni Department of Health Secretary Teodoro Herbosa ti pannakaiserra wenno pannakapaiget ti border iti baet ti ngumatngato a kaso ti COVID-19 idiay Singapore.
Segun ken ni Herbosa nga awan ti planona nga ikiddaw ti panangipatungpal ti mandatory a panagsuot ti face mask ti publiko.
Inbatadna nga awan ti requirement para iti border control, mandatory mask ken kanayonan a bakuna ngem agtultuloy a banbantayanda dagiti nasao a kaso.
Immunan a naipadamag a nagdoble ti kaso ti COVID-19 idiay Singapore iti napalabas a lawas isu a ngimmato ti demand iti COVID-19 test iti nasao a pagilian.
Inbatad ni Herbosa nga adda dagiti pribado nga ospital a saanna a dinakamat nga adda ti nagpositibo iti COVID-19 kadagiti medical workers.
Imonmonitor dagiti health officials iti pagilian ti situasion iti Singapore no sadino nangato ti kaso gubuay iti FLiRT variant.
Iti saludsod met no addan ditoy Pilipinas ti FLiRT variant, inlawlawag ni Herbosa a posible daytoy ngem saan a seryoso daytoy ken ibilangda a variant under monitoring.
Imonmonitor pay ti Department of Health ti influenza – like illnesses iti pagilian.
Immunan a kinumpirmaran ti Department of Health a makairekrekordda ti apagapaman a panagngato ti COVID-19 iti pagilian ngem inpasiguradona nga agtalinaed a low risk classification ti amin a rehion iti Pilipinas.
