LAOAG CITY – Awan ti mapasamak a transport strike ditoy probinsya ti Ilocos Norte kas protesta iti PUV modernization.
Daytoy ti inpakaammo ni Mr. Perry Martinez, mangidadaulo ti Metro Ilocos Norte Council.
Segun ken ni Martinez, naiget ti pannakaikoodenar ken komunikasyon nga ipapaay ti opisina na kadagiti grupo ti jeepney drivers ditoy probinsya rason nga awan dagiti makita nga ado a problema.
Gapu iti daytoy, kuna na nga awan ti naruay a problema kadagiti operators wenno drivers ken adon dagiti nakasagana para iti panagutang ti modern jeepney.
Kabayatanna, inbatad ni Martinez nga adda ti addang ti gobierno probinsyal babaen iti panangidaulo ni Gov. Matthew Marcos Manotoc tapno masuposopan ti problema dagti jeepney drivers.
Inbunannag na a ti saan a mautang a paggatang ti lugan dagiti nagduduma a transport cooperative ket ti probinsya ti mismo a mangipabulod.
Kuna na a babaen iti daytoy nga addang ket in-inot a makapagbaliw iti modern jeep dagiti dati a traditional jeepney operators.
Naamoan a masapol ti agingga 200 a modern jeepneys ti agoperar ditoy probinsya tapno maakomodar dagiti amin a commuters.
Kabayatanna, iti agdama ket adda pay laeng ti nasurok 30 a modern jeepney ti ago-operar iti intero nga Ilocos Norte.
