LAOAG CITY – Awan ti ammo ni Engr. Neil Jose, operations manager iti Florida Bus Company ditoy Ilocos Norte, a rason a nangbakaan da manen kadagiti dua a bus da.
Ti nagbalin a palawag ni Jose iti PNP ket awan ti ammo na a napaspasaktan da nga empleyado kas koma kadagiti nagikkat.
Inlawlawag na a nagduduma a rason dagiti empleyado no agikkat da kas iti adda agbasa ken dagiti dadduma ket agtrabaho da idiay abroad.
Mamati ni Jose a nabartek dagiti nangbakal ti bus da iti Brgy. Barit ditoy siudad ti Laoag idinto a patyen na a naigagara ti pannakabakal ti bus da iti bypass road.
Inkiddaw na kadagiti makagurgura iti kompanya da nga agturong da laeng iti opisina da tapno mapagsasaritaan da no ania da dagiti parikot da.
Innayon ni Jose a maipaayan ti dakkel a gunguna dagiti makaitudo no siasinno dagiti nangbakal manen kadagiti dua a bus da.
Maipalagip a nabulsek ti maysa a mata ti maysa kadagiti driver da iti kallabes kalpasan a nabakal ti inturong na bus iti paset na iti Ilocos Sur.
Kabayatanna, agtultuloy ti naiget nga imbestigasyon ti Philippine National Police ditoy siudad ti Laoag mainaig kadagiti suspek a nangbakal kadagiti dua a bus ti Florida.
Daytoy ti inpakaammo ni Police Lt. Col. Amador Quiocho, hepe ti PNP Laoag.
Kuna na a no bilang matiliw dagiti suspek ket mapilaan da ti kaso a damage to poperty gapu ti inaramid da.
Inkiddaw ni Quiocho iti publiko ti pannulong da tapno masulbar ti nasao a pasamak kageddan ti apela na nga isardeng koma dagiti maseknan ti agaramid ti panagbakal gapu ta saan la a ti lugan ti mabalin a maperdi ngem mabalin a mairamraman dagiti nakalugan.
