LAOAG CITY – Awan ti nagbaliwan ti bilang dagiti maparparti a baboy iti ili ti Piddig kalpasan a naikabil iti pink zone.
Daytoy ti inbaga ni Mr. Junjun Cayaban, Meat Inspector ti Slaughter House iti ili ti Piddig.
Segun ken ni Cayaban, siguden a ti inaldaw a maparparti iti slaughter house iti ili ti Piddig ket umab-abot iti 21 agingga iti 22 a baboy ken uppat a baka.
Maipalagip a naipan iti pink zone iti ili ti Piddig kalpasan a naipan a red zone dagiti kabangibang na nga ili gapu iti pannaka-apektar da iti African Swine Fever (ASF) virus.
Kabayatanna, inadmitir ni Cayaban nga idi nakumpirmaran nga adda ti kaso ti ASF virus iti ili ti Solsona ket naalarma dagiti sumagmamano a barangay iti ili ti Piddig kas iti Barangay San Antonio, Boyboy, Sta. Maria ken Tonoton.
Dagus met nga insayangkat ti Municipal Agriculture Office ti Information dessemination kadagiti amin a barangay iti ili ti Piddig tapno maiyadal a naimbag kadagiti residente ti maipanggep iti ASF virus.
Kabayatanna, inpasigurado ni Cayaban nga amin a maparparti a baboy iti slaughter house da ket natalged ken saan nga apektado ti ASF virus.
