LAOAG CITY – Inpakaammo ni Mayor James Bryan Alcid nga awan ti nagkaiwarang a badjao wenno nagpalama kabayatan ti paskua ditoy siudad ti Laoag.
Segun kenkuana, daytoy ket kalpasan a napintas ti nagbalin a kooperasion ti City Social Welfare and Development Office, Municipal Disaster Risk Reduction and Management Office ken dadduma pay nga ahensia ditoy siudad iti panangmonitor kadagiti badjao iti napalabas a paskua.
Inbatadna nga adda ti pannakisaritana kadagiti nadakamat a pangopisinaan maipanggep iti daytoy a banag tapno masigurado nga awan dagiti badjao a makita ditoy siudad nga agkaiwarang wenno agpalama.
Inlawlawagna a saan met a panang-discriminate kadagitoy gapu ta saanda met a pawilan nga umay basta laeng saanda nga agkaiwarang wenno mangriribuk.
Innayonna a no madlaw ket awan unay ti makitkita itan gapu kadagiti addang nga ar-aramidenda a saan a kas kadagiti naglabas a tawen a naruay dagiti agkaiwarang a badjao ditoy siudad ti Laoag.
