LAOAG CITY – Naragsak nga inpakaamo ni Dr. Rodrigo Catcatan, mangidadaulo iti City Health Office a maibilang a zero firecracker related incident ditoy siudad ti Laoag.
Daytoy ti inbatad na kalpasan nga awan dagiti nairekord ti opisina da nga indibidual a nasugatan wenno naputokan ti ania man a paputok.
Kunana nga apaman a nalpsen ti panangsarabo ti baro a tawen ket awanen dagiti residente nga adda ti ikot na a paputok tapno masigurado nga awanen dagiti maiyasideg iti ania man a risgo.
Inrakurakna a nagbalin nga epektibo ti panagtitinulong ti Philippine National Police ken ti Local Government Unit ditoy siudad a nangiwayat ti information dissemination wenno ti panagballaag iti publiko.
Namnamaen ti City Health Officer a mapagtalinaed a zero firecracker incident ditoy siudad kadagiti sumarsaruno a tawen.
Kabayatanna, nagpanawagan ni Dr. Catcatan iti publiko nga annadan ti salun-at iti daytoy a tawen 2025 tapno maliklikan dagiti nagduduma a sakit ken agbalin a nasalun-at iti sibubukel a tawen 2025.
