LAOAG CITY – Inlawlawag ti Department of Health nga awan ti nairekord a Monkeypox wenno ti maaw-awagan itan nga Mpox iti ayannoman a rehion ditoy pagilian.
Dinakamat ni Department of Health Spokesperson Albert Domingo ti datos manipod iti Department of Health -Research Institute for Tropical Medicine (RITM) idi Hunio 8, amin a dimmalan iti test ti Mpox ket negatibo ti resultada.
Nangiruar ti palawag ni Domingo kagiddan iti imbestigasion ti Department of Health Central Visayas ti pannakatay ti maysa nga agtawen ti 27 a lalaki manipod idiay Negros Oriental a maipagarup a mapagat-atapan a kaso ti Mpox.
Ti Mpox ket maysa a makaakar a sakit gubuay iti monkeypox virus. Daytoy ket malasin kadagiti nasakit a lamma iti kudil ken panaggurigor.
Karaman kadagiti kangrunaan a sintomas ti Mpox ti pantal iti kudil wenno dagiti mucosal lesion nga agpaut ti dua agingga uppat a lawas no sadino makapasar ti gurigor, panagsakit ti ulo, panagssakit ti bagi, panagsakit ti likud, nabannog ken dadduma pay.
Naammoan a ti nasao a sakit ket maiyakar iti tao babaen ti direct contact iti tao nga addaan ti impeksion, kontaminado a materyal wenno dagiti naakaran nga ayup.
Maipalagip nga idi Hulio 2022, kinumpirmaran ti Department of Health ti umuna a kaso ti Mpox ditoy Pilipinas a pakairamramanan ti agtawen ti 31 a Pilipino a nagsubli ditoy pagilian manipod iti ballasiw taaw.
