LAOAG CITY – Inpakaammo ni Atty. Joel Gines, Provincial Election Supervisor nga awan dagiti kandidato para iti 2025 Midterm Elections ditoy probinsia ti napilaan ti pannakakanselar, pannakadiskualipikar wenno maibilang a nuisance ti inpasada a Certificate of Candidacy.
Inlawlawag ni Atty. Gines nga awan unay ti epektona ti panagadu ti bilang dagiti botante inton eleksion kalpasan iti kellaat a panagngato ti bilang dagiti botante kadagiti sumagmamano a lugar ditoy pagilian.
Inbatadna a basar iti obserbasionda ket ti panangipakita laeng ti valid ID iti panagparehistro ti naabuso nga isu ti mabalin a nangitunda iti daytoy.
Kunana a no mapaneknekan ti Commission on Election a dagiti botante ket saan a pundo a residente iti lugar a nagrehistroanna ket posible a maikkat dagitoy.
Mainaig iti daytoy, kuna ni Atty. Gines a dagiti kualipikado nga ag-transfer wenno umakar iti lugar ket dagiti adda ti gagemna nga agnaed iti lugar a pagakaranda.
Kabayatanna, naammoan a nupay nakapilan ti kandidatura dagiti kandidato ket saan pay a maibaga dagitoy nga opisial a kandidato agingga a saan pay a nangrugi ti panagkampania.
