LAOAG CITY – Awan ti national law a mangipawil ti panagparti ti dingwen iti arubayan wenno backyard slaughtering.
Daytoy ti naduktalan ni Konsehal Jason Perera ditoy ciudad ti Laoag.
Rakurak daytoy ni Perera kalpasan nga inaprubaran ti konseho ditoy ciudad ti maysa nga ordinansa ni Konsehal Kiko Ang a masapol a dagiti four-legged a taraken kas ti baboy, kalding ken dadduma pay ket maparti amin iti slaughterhouse uray dagitoy ket personal consumption laeng.
Ti nasao nga ordinansa ket inaprubaran metten ni Mayor James Bryan Alcid ditoy ciudad ti Laoag.
Kunana a mariribukan gapu ta namati ti kaadoan a kameng iti konseho iti nagbalin a rakurak dagiti sumagmamano a department heads iti gobierno lokal ditoy ciudad nga adda ti national law maipanggep iti daytoy nga addang.
Gapu iti daytoy, inbalakad ni Perera kadagiti kakadwa na iti konseho a saan a basta mamati kadagiti impormasyon no awan ti umdas a pagibasaran da.
Inlawlawag na a nakailanad iti national meat inspection service a ti backyard slaughtering ket maipawil laeng kadagiti aglaklako ti karne wenno dagiti agsupsuplay ti karne iti merkado publiko.
