LAOAG CITY – Inlawlawag ni Vice Mayor / Presiding Officer Rey Carlos Farinas nga awan iti ordinansa wenno executive order a mangipalubos iti pannakaserra dagiti kalsada iti aglawlaw ti Centennial Arena.
Komento daytoy ti bise mayor iti facebook post iti Laoag City Police Station maipanggep iti traffic Advisory wenno pannakaserra dagiti sumagmamano a kalsada iti aglawlaw ti Centennial Arena gapu iti selebrasyon ti Teacher’s day .
Segun kenni Farinas, masansan a kastoy iti makitkitana idinto nga awan met ti pannakaipakada wenno pannakaipakaammo daytoy iti Sanguniang Panglunsod.
Kunana a daytoy panag-rerouting iti trapiko ken panagserra iti kalsada ket saan nga otorisado gapu ta maibasar iti Local Government Code (R.A. 7160) ket ti laeng City Mayor ken Sanguninag Panglusod iti addaan iti bileg a mangipalubos kadagiti kastoy nga aramid.
Mainaig iti daytoy, sinalusod pay ti bise mayor no adda iti nagbalin a komunikasyon dagitoy iti City Mayor gapu ta saan a mabalin no isuda laeng ti agdesdesisyon.
Kabayatanna, inpanamnama ti bise mayor ti panagimbestigar da mainaig iti daytoy a banag ken iyumanda iti Department of Interior and Local Government ditoy ciudad.
