LAOAG CITY – Inalay-ayan ti Philippine Institute of Volcanology and Seismology wenno PhiVolcs ti panagamak iti pangta ti tsunami ditoy pagilian kalpasan a dinayyeg ti napigsa a ginggined idiay Tonga Islands idi kalman, Marso 30.
Inisyal a nairekord ti Philippine Institute of Volcanology and Seismology ti kinapigsa ti ginggined a magnitude 7.3 nga adda ti kaunegna a 59 a kilometro agarup alas-8:19 idi rabii.
Inaramid ti ahensia ti panangilawlawag gapu iti kastoy a kinapigsa ti ginggined ket posible a mangitunda ti tsunami waves iti uneg ti 300 a kilometro manipud iti sentro ti ginggined iti paset ti kabaybayan ti Tonga basar iti Pacific Tsunami Warning System.
Naammoan a ti Tonga ket isu ti maudi a Polynesian kingdom a bukbuklen ti 170 nga isla a 36 ditoy ket inhabited.
