LAOAG CITY – Inreport ti Philippine Embassy iti Tehran nga awan pay dagiti Pilipino a naapektaran iti kumarkaro a tignay-protesta idiay Iran.
Basar iti Department of Foreign Affairs (DFA), adda ti sumurk-kumurang a 823 a Pilipino nga agdama nga adda idiay Iran, kaadoan kadakuada ket permanente a residente kas asawa wenno anak ti Iranian nationals.
Maipalagip a namonganay iti nalawa a tignay protesta iti intero a pagilian sipud pay idi Disyembre 28, 2025, kalpasan a nairekord ti kangatoan a lebel ti inflation, a nangpakaro iti krisis iti ekonomiya ti Iran.
Alisto a nagwaras ti tignay protesta iti nagduduma a rehiyon, kangrunaan na dagiti marigrigat a mangkidkiddaw ti panagleppasen ti rehimen ni Supreme Leader Ayatollah Ali Khamenei.
Gapu iti riribok, nangipatungpal dagiti otoridad ti internet shutdown ken nangipatulod ti sibubukel a tropa ti security forces.
Mainaig iti daytoy, adda ti report ti Iranian Media a saan a nababbaba ngem 2,000 a demonstrador ti natay kalpasan ti maipagarop a panagusar ti live ammunition dagiti otoridad, ngem 544 paylaeng ditoy ti kumpirmado a natay iti datos ti U.S.-based Human Rights Activists News Agency.
Innayon ti Department of Foreign Affairs, nga agtultuloy ti panangbalakad ti Philippine Embassy iti Tehran kadagiti Pilipino nga agtalinaed nga agannad ken limitaran ti panagruwar kabayatan nga agtultuloy ti riribok iti pagilian.
