LAOAG CITY – Inlawlawag ni Police Chief Insp. Rodelio Santos, hepe ti PNP Bacarra ti napasamak iti nagbaetan ti grupo ni Mr. Rodolfo Christian Fariñas III kenni Mr. Derek Velasco, agpada a kandidato iti kina barangay chairman.
Kuna na nga idi nagresponde da iti Sitio dos iti nasao a barangay ket maipagarup a nabakal ti lugan ti agnagan ti Jonas Cajigal a kagrupo ni Mr. Rodolfo Christian Fariñas III, kandidato para barangay chairman iti nasao a barangay.
Segun kenni Santos, kalpasan ti sumagmamano a kanito ket dimteng ni Diputado Rudy Fariñas bayat ti kaadda da iti nakapasamakan ti maipagarup a panagbakal.
Mainaig iti daytoy, inkalintegan ni Santos iti napigsa a panamagsasao ni Cong. Fariñas bayat nga adda iti nasao a lugar.
Kuna na nga gagangay laeng a napigsa ti uni na gapu ta naringgor iti lugar iti nakapasamakan ti kumusyon.
Kabayatanna, inpakaammo ni Santos a nairana ti insidente ti panagbakal iti maipagarup a panangdangran ni Mr. Derek Velasco, kandidato para barangay chairman, iti kandidato para barangay kagawad a ni Mr. Jovencio Matias.
Inlawlawag na a bayat a magmagna ni Velasco iti paset ti Sitio dos ket induron ni Matias rason a natulid ti kandidato para kapitan.
Gapu iti daytoy, kuna ni Santos nga dinanug metten ni Velasco ti kandidato para kagawad.
Innayon ti opsiyal a nangipila metten ni Velasco ti reklamo kontra kenni Matias ngem inrekomendar na a matratar ti problema iti barangay lupon.
Inpetteng na nga awan ti isyu iti nagbaetan da Velasco kenni Fariñas ngem ketdi da Velasco kenni Matias.
