LAOAG CITY – Kinumpirmaran ni Mr. Jerome Fabi, Local Disaster Risk Reduction and Management Officer iti ili ti Bangui nga awan ti naiyatnag a tsunami alert kalpasan a nagsentro ti magnitude 5.9 a ginggined iti ilida itay 2:54 ti parbangon.
Nupay kasta, inpasingkedna nga adda ti ballaagda kadagiti residente kadagiti coastal areas nga agbalin a naridam.
Inbatadna a manarimaan pay laeng ti panangisayangkatda ti assessment iti area of responsibility-da.
Kunana nga awan dagiti napan nagibakwit kadagiti evacuation center ken awan ti aftershocks a simmaruno kalpasan ti napigsa a ginggined.
Inlawlawagna a kabayatan a maisursurat daytoy a damag ket awan ti report a dimmanon iti opisinada nga adda dagiti nadadael gapu iti ginggined.
Innayonna nga iti agdama ket awan met pay ti pannakakanselar ti klase kadagiti pagadalan ken pangopisinaan.
