LAOAG CITY – Balligi ti pannakairubuat ti Ayala Museum Doll Collection Exhibit iti ili ti Paoay.
Segun ken ni Mr. Xavier Ruiz, Officer In Charge ti Ilocos Norte Tourism Office, nangrugi ita nga aldaw ti nasao nga aktibidad ken agngudo inton Enero 31, 2025.
Inbatadna a nagasat ti Ilocos Norte gapu ta maipabuya a libre iti publiko dagiti 28 a doll collection para iti amin.
Naammoan a residente man ditoy Ilocos Norte, turista wenno dagiti gangganaet ket awan ti bayadanda apaman a sumrek iti Ayala Museum Doll Collection Exhibit.
Babaen iti daytoy, naiget a maital-o dagiti aruat dagiti Pilipino iti daytoy a baro nga henerasion.
Mainaig iti daytoy, kalikagum ni Gov. Matthew Marcos Manotoc a mai-upgrade dagiti museum ditoy probinsia tapno maipreserbar dagitoy para iti sumarsaruno pay nga henerasion.
Kabayatanna, inpakaammo ni Ms. Aprille Tijam, Associate Director ken Head of Exhibitions and Collections, daytoy ti umuna a gundaway a mairubuat ti naisangsangayan nga aktibidad ditoy probinsia a gagem a maiyasideg ti pakasaritaan maipanggep iti Filipino costumes kadagiti agtutubo nangruna kadagiti estudiante.
Maipalagip a nakikammayet ti Provincial Tourism Office iti Ayala Museum tapno maitandudo dagiti scale dolls a mangirepresentar ti Philippine Traditional Attire manipud kadagiti nagduduma a period wenno panawen.
Immuna iti daytoy, naitantan ti pannakalukat ti Ayala Museum Doll Collection Exhibit gapu kadagiti naglabas a bagyo a dimmuprak ditoy probinsia.
