LAOAG CITY – Naisalakan dagiti kameng ti National Bureau of Investigation babaen iti Bombo Radyo Laoag ti maysa a babai a maipagarup a biktima ti illegal detention iti Brgy. 2 iti ili ti San Nicolas.
Segun kenni Agent Manuel Sanchez iti NBI ditoy siudad ti Laoag, nakaawat da ti tawag manipud kenni Laoag City NBI Chief Hilario Manding seknan ti panagpatulong ti maseknan iti nasao nga ili.
Gapu iti daytoy, nabuangay ti grupo dagiti kameng ti NBI tapno mapan da isalakan ti babai ken dita a nadanun da iti pagtaengan ni Dr. Leonel Obien, dati a Municipal Health Officer iti ili ti San Nicolas.
Kuna ni Sanchez nga apaman nga inyam-ammo da ti bagbagi da a kameng ti NBI ken naibaga ti gagem da ket natallugod ti doktor a nangpastrek kadakuada agingga iti maikadua a kadsaaran ti pagtaengan.
Nakita da ti maysa a kuarto iti maikadua a kadsaaran ti pagtaengan ken daytoy ket nagalutan ti ridaw babaen ti nylon cord, ken iti pananglukat dagiti kameng ti NBI ket nakita da ti babai nga agsangsangit.
Mainaig iti daytoy, inbunannag ni Sanchez a saan met a naglikudan ti doktor ti nasao nga aramid gapo ta dagitoy ket nagriri no sadinno a nagkinnamatan da agingga a napan ti biktima iti uneg ti maysa a kuarto a poon nga inlock na daytoy gapu ti panagbuteng na a madangran daytoy.
Inbatad ni Sanchez a gapu ta saan a kayat ti babai ti rumwar ken saan a malukatan ti doktor ti ridaw ket dita met nga ingalot na ti ridaw.
Kabayatanna, naamuan pay ni Sanchez ti maipagarup a panangdangran ni Obien iti babai ngem naglikudan ti doktor daytoy.
Iti pannakaipadalan ti medikasyon ti babai ket naamuan a nagsagaba kadagiti litem iti bagbagi na.
Kuna ni Sanchez a basar iti biktima ket masansan ti pannakadangran na nangruna no nakainom ti nasanger ti doktor agraman ti panamagsasao na iti dakes.
Inpetteng met ti babai a madangdangran ken napung-pungot agraman ti maipagarup a pannakapangta na babaen ti doktor.
Inlawlawag ti babai nga ita laeng a nagreklamo iti baet a nabayagen a maar-armaid kenkuana iti pannakadangran na gapo ta saan nan a kabaelan.
Kabayatanna, Kuna ni Sanches a maipila ti reklamo a panaglabsing iti Violence Against Women and their Children kontra iti doktor iti piskalya.
Innayon na a possible met a maapektaran ti propesyon ti doktor kas iti kabalinan a maipila ti kaso administratibo kontra kenkuana.
