LAOAG CITY – Kinumpirmaran ni Barangay Chairman Banuar Malaqui iti Brgy. 22 San Cristobal iti ili ti Sarrat, a pimmusay ti maysa a babai a naireklamo kalpasan a natratar ti isyu kontra kenkuana gapu ti maipagarup a panangilive na ti panagapa dagiti agassawa iti nasao a lugar.
Kuna na a nagsasango da iti Sitio 4 para ti pannakataming ti reklamo kontra kenni Tessie Baluan gapu ti maipagarup a napasamak.
Inbatad ni Malaqui a naurnos met laeng ti reklamo kontra iti biktima ngem idi mapan na alaen ti pagmulta na a 500 a pisos ket dita a kelaat a natumba ken dagus a naitaray daytoy iti ospital.
Segun kenni Malaqui, possible a nadaraan ti ulo ti maseknan gapu ti pannakatumba na.
Nupay kasta, saan nga ammo ni Malaqui ti pudno a nakatayan ti maseknan kalpasan a natumba daytoy.
Naitabonen ti bangkay ti maseknan idi kalman.
Kabayatanna, inlawlawag ni Mr. Marcial Agoto, presidente iti Purok 4 iti Brgy. 22 San Cristobal iti ili ti Sarrat a nairana iti panagapa dagiti agassawa idi agpatpatumar ni Tessie Baluan iti asawa na a masakit.
Kuna na a ti asawa na ket agsagsagaba ti sakit a TB ken tultulongan ti gobyerno daytoy para iti agas na.
Segun kenni Agoto, masapul a maivideo ti panagtumar ti masakit kas pammaneknek nga agtumtumar met laeng kadagiti agas na.
Inbatad na a nailive ti pannakaivideo ti pasyente nga agtumar ken mangmangeg ti panagapa dagiti agassawa.
Kuna ni Agoto a nakita dagiti friends ni Baluan ken nangeg ti panagapa dagiti agassawa ken nakita ni Johnny Baluan ti live video.
Naibalakad ti lalaki a Baluan iti pannakaidelete ti live video ngem saan nga ammo ti maseknan rason nga indisso na laengen ti cellphone.
Kabayatanna, inlawlawag ni Agoto a nagpakawan ti biktima kadagiti nagreklamo ngem ti babai a ni Myra ket naibaga na kenni Tessie a saan a makaumanay ti 500 a pisos a multa na rason a kiniddaw na ti 1,000 a pisos a pagmulta ti maseknan.
Nagpinnapilit dagiti maseknan maipanggep iti multa a 500 a pisos ken 1,000 a pisos.
Kalpasan na, kuna ni Agoto a naulaw ti kasinsin na a ni Tessie Baluan ket idi manarimaan ti panagaramid ti sekretaryo iti kasuratan, dita a natumba ni Baluan.
Innayon ni Agoto, ti laeng palawag ti kasinasin na a ni Tessie Baluan ket gagem na laeng a maivideo ti panagtumar ti asawa na gapu ta kasapulan ti gobyerno kas pammaneknek para iti pannakaipaay ti tulong iti masakit nga asawa na nga agsagsagaba ti TB wenno tuberkulosis.
Naala ti boses dagiti agassawa iti cellphone nupay addaan iti agarup innem a metro ti kaadayo manipud iti lugar ti maseknan.
Nakasirita ni Agoto ti anak ni Tessie Baluan mainaig iti panagpablotter na iti PNP ngem iti barangay kagawad ti pinakadua na kalpasan a pimmusay ti nasao nga ina.
Kabayatanna, inbutaktak ni Jessa Baluan, anak ni Tessie Baluan, a maipagarup nga adda ti gandat a pannakadangran na babaen kadagiti nagreklamo kontra iti ina na idi mapan na arayaten daytoy.
Kuna na nga insawang pay ti agnagan ti Jamaica a drama laeng ti ina na ti panaglusdoy na.
Inbatad ni Baluan nga ammo dagiti maseknan nga adda ti sakit ti puso ti ina na.
Innayon na a plano da ti agreklamo kontra kadagiti maseknan mainaig iti ipupusay ti ina na kalpasan a naglus-doy idi nagsasango da iti Purok 4.
