LAOAG CITY – Natakawan ti maysa a babai apaman a rimmuar daytoy iti St. William’s Cathedral ditoy siudad ti Laoag.
Segun ken ni P/Lt.Col. Ryan Retotar, Hepe ti Laoag City Police Station, agarup alas dose iti tengnga ti pangaldaw, apaman a rimmuar ti biktima iti simbaan ket adda lattan ti maysa a babai a kellaatna a ginuyod ti bag daytoy.
Inbatadna nga iti panagginnuyod ti biktima ken suspek iti bag ket naipurwak ti wallet ti biktima nga insigida a napan met pinidot ti suspek.
Gapu iti daytoy, nagginnuyod manen ti biktima ken suspek iti wallet ti biktima no sadinno a naala met laeng ti biktima ti wallet-na nga insigidana nga in-report ti napasamak iti kaasitgan a kuerpo ti pulisia.
Babaen iti daytoy, insigida a natiliw ti suspek a maysa a babai nga agtawen ti mapattapatta a sumurok-kumurang 50.
Mainaig iti daytoy, inpakaammo ni P/Lt.Col. Retotar nga adda pay ti uppat wenno lima nga indibidual a kadua ti suspek pakairamanan ti menor de edad ken rumrummuar a kabagianna ngem nagtalaw dagitoy kalpasan ti pannakaarestar ti suspek.
Inlawlawagna nga addan ti dati a rekord ti suspek iti Laoag City Police Station iti kapada met laeng a kaso a panagtatakaw.
Nupay kasta, saan a nangipila ti reklamo dagiti immuna a nabiktima kontra iti suspek pakairamanan ti naudi a biktima ti panagtatakaw.
Iti agdama, nagtalinaed iti pagbaludan ti suspek.
