LAOAG CITY – Sumango iti kaso a theft ti agtawen ti 26 a babai a taga Gomburza St. Barangay 3 ditoy ciudad ti Laoag kalpasan ti panangserrek na ti maysa nga apartment iti Barangay 11 ditoy ciudad.
Daytoy ti inbatad ni Police Lt. Winie Rabina, ti mangidadaulo ti investigation section iti PNP ditoy ciudad ti Laoag.
Segun ken ni Rabina, napan sinerrek ti suspek ti apartment ti agtawen ti 51 a babai iti oras ti 1:40 ti parbangon idi domingo.
Inbaga na a basar iti palawag ti biktima ket nakariing da iti iseserrek ti suspek ken nakita da a mismo ti panangpidot na ti cellphone na ngem saan da a napan naagaw gapu ta nakaiggem daytoy ti kutsilyo.
Inpakaammo ni Rabina a babaen iti nakamuntar a CCTV camera iti nasao nga apartment ket nabigbig da ti suspek ken dagus da a nangiyuswat ti hot pursuit operation no sadinno a natiliw da a mismo ti suspek iti pagtaengan da.
Naduktalan nga addan ti immuna a kaso a panatakaw ti suspek, addan 10 a tawen ti napalabas.
