LAOAG CITY – Nagtalinaed a kritikal ti maysa a babai kalpasan ti napasamak a nadisgrasya iti paset ti Gilbert Bridge ditoy ciudad ti Laoag.
Nabigbig ti biktima a ni Elsie Fuerte Corpuz, agtawen ti 56 ken residente iti Barangay 40, Balatong ditoy ciudad.
Basar iti imbestigasyon, agpapa-abagatan ti biktima a nakalugan ti motorsiklo iti Gilbert Bridge idi natukbob daytoy ti sumarsaruno kenkuana a kotse.
Gapu iti napasamak ket nagbaliktad ti nakamotorsiklo a nangitunda ti panagsagaba na iti sugat ti ulo, ken naitaray a dagus iti Governor Roque Ablan Senior Memorial Hospital para iti naan-anay a pannakataming na.
Naamoan nga agpada a naiyisoan ti ticket dagiti dua a driver gapu ta ti nakamotorsiklo ket awan ti lisensya na idinto a ti nangiturong iti kotse ket student permit ti iggem na.
Iti agdama, agtultuloy ti imbestigasyon dagiti otoridad mainaig iti nasao nga insidente.
