LAOAG CITY – Mapukpukaw dagiti alahas ken kuarta ti maysa a babai a nakita a natay iti uneg mismo ti pagtaenganna iti Barangay Lumbad iti ili ti Dingras.
Ti biktima ket agtawen ti 39, aglaklako ti nateng ken pancit iti tiendaan, tubo idiay Bangued, Abra ngem agdama nga agnanaed iti nasao a barangay.
Segun ken ni Ms. Jaylyn Cabudol, kabsat ti biktima, sumagmamano a daras a nagtuktok iti ridaw ti pagtaengan ti kabsatna ngem saan pulos daytoy a simmungbat ken linuktan ti ridaw.
Gapu iti daytoy, kunana a napanna innala ti duplicate a tulbek ti ridaw ket ditoy a nakitana ti kabsatna nga awanen ti biagna a nakagalut ti dua nga imana, nakalislis ti badona ken naabbungan ti rigis ti rupana.
Inbatadna nga apaman a nakastrek isuna iti pagtaengan ti kabsatna ket nakitana a nawarwara dagiti kagamitan daytoy.
Inlawlawagna nga awan met ti malagipna a nakariri ti kabsatna a mabalin a nangaramid daytoy kenkuana.
Naammoan nga addan ti lima nga oras ti napalabasen sakbay a nakita ti bangkay ti biktima ken rumrummuar iti imbestigasion dagiti otoridad a natiritir pay ti ulona.
Innayonna a sakbay ti insidente ket nadakamat ti kabsatna nga adda ti nangubor iti pagtaenganna ti dadakkel a bato iti namindua a daras.
Mainaig iti daytoy, inpakaammo ni Mrs. Evelyn Avez, katugangan ti biktima nga arig blangko pay laeng iti panunotna iti agdama gapu ta saanna a masinunuo no asino ti mabalin a nangpapatay iti biktima nangruna ket ibilangna a nasayaat ken nasingpet ti manugangna.
Kabayatanna, kuna ni P/Maj. Norman Pentang, Hepe ti Dingras Municipal Police Station a basar iti inwayatda nga imbestigasion ket nakita nga adda ti sugat iti rupa ti biktima, naabbungan ti buok ti rupana ken nakatali ti bibigna babaen ti elastic bandage.
Iti agdama, agtultuloy ti naun-uneg nga imbestigasion dagiti otoridad mainaig iti insidente.
