LAOAG CITY – Naarestar ti maysa a babai a senior citizen kalpasan a nagsipdot kadagiti sumagmamano a produkto iti maysa a mall iti ili ti San Nicolas.
Ti suspek ket agtawen ti 60, balo ken residente ti Perez St. Tonsuya, Malabon City, Metro Manila.
Basar iti imbestigasion, sakbay ti insidente ket inimpormaran ti Beauty Advisor ti Manager-na nga adda ti tallo nga indibidual ti mapagat-atapan ti garawna iti aglawlaw ti maysa kadagiti store iti mall.
Gapu iti daytoy, insigida a rinebyuda ti ala ti Close Circuit Television wenno ti CCTV camera, nakitada ti maysa a saan pay a nabigbig a lalaki ken dua a babbai nga innalada dagiti produkto ken inkabilda iti shoulder bag ken inyawatda dagitoy iti suspek.
Nagal-alisto a timmalaw dagiti nangiyawat kadagiti produkto ken nabati ti suspek iti store rason a natiliw daytoy.
Mainaig iti daytoy, narekobre dagiti otoridad manipud iti suspek ti maysa a Beach Hut Lotion, maysa a Beach Hut Spray ken dadduma pay nga agbalor amin ti 3,996 a pisos.
Kabayatanna, dagiti natakaw a produkto ket naikabil iti San Nicolas Municipal Police Station idinto a ti suspek ket agdama a nakabalud ken manamnama a sumango ti maiyannatop a pannusa.
