LAOAG CITY – Kinumpirmaran ni Police Lt. Col. Rafel Lero, chief of police ti PNP-Laoag nga adda manen ti naglibas manipud iti Sitio Karuked iti Barangay 23 ditoy ciudad a maysa kadagiti nakaipatungpalan ti lockdown gapo iti covid-19.
Segun kenni Lero, kabayatan ti panangsursur na kadagiti amin a barikada kadagiti nakalockdown a Sitio ket awan ti bantay iti nasao a paset ti lugar isut gapo na nga isu na ti nagbantay pay laeng.
Inlawlawag na a ditoy met a sumrek kuma ti agtawen ti 31 a babai a naglibas ken idi damagen na no naggapoan na ket napan iti Barangay Dilavo iti ili ti Pasuquin tapno itulod ti kabsat na.
Gapo iti daytoy, babaen iti koordinasyon da iti PNP Pasuquin ken iti City Health Office ditoy ciudad ket in-lockdown da met ti balay a napanan ti nasao a babai.
Inbatad na a basar iti palawag ti pulis a nadutukan nga agbantay iti barikada ket pimmanaw biit tapno mapan gumatang ti agas na gapo na agsakit ti buksit na ken adda ti tanod idi pumanaw daytoy.
Nupay kasta, inpetteng ni Lero nga awan ti nadanon na uray siasinno man a bantay iti nasao a barikada.
Mainaig iti daytoy, kuna ni Lero a nasukatan ti pulis nga agbantay iti nasao a lugar bayat a maiyus-uswat ti imbestigasyon da tapno madeterminar no adda ti panagliway ti dati a nakabantay.
Innayon na a ti kangrunaan a pagpokusan da ket no kasano a nakarwar ti nasao a babai iti laksid nga adda ti nadutukan nga agbantay.
