LAOAG CITY – Balligi a naarestar ti maysa a babai a maibilang a Top 2 Wanted Person iti siudad ti Batac.
Basar iti San Nicolas Municipal Police Station, adda ti naawatda a tawag babaen ti 911 hotline no sadinno a naipakaammo kadakuada a ti suspek ket adda iti maysa a bus terminal iti siudad ti Batac.
Mainaig iti daytoy, apaman iti panangberipikar dagiti otoridad ket naduktalan a ti suspek ket sumangsango ti qualified theft ken narekomendaran nga agpiyansa ti 120 a ribu a pisos para iti temporario a pannakawaya-wayana.
Gapu iti daytoy, insigida a nakikoordinar ti San Nicolas Municipal Police Station iti Batac City Police Station no sadinno a natiliw ti suspek iti paset iti ili ti San Nicolas.
Naammoan a ti suspek ket agtawen ti 31 ken residente ti Barangay Palongpong iti siudad ti Batac.
Kabayatanna, ti suspek ket nabayagen a birbiruken ti dati a nagtrabahoanna gapu iti sangsangoenna a kaso.
