LAOAG CITY – Natay ti maysa a babai, kalpasan a nagbekkel iti uneg ti pagkaskaseraan na iti Sitio Dungtal, Brgy. 23 San Matias, ditoy siudad ti Laoag.
Segun kenni Patrolman Carl Jeric Buenavista, imbestigador ti PNP Laoag, ti biktima ket agtawen ti 38 ken naasawaan.
Kuna na a nakita ti caretaker ti pagkaseraan a ni Lorna Barut Retondo a nakabitin ti biktima iti paglabaan a paset ti kasera na.
Inbatad ni Buenavista a nagbatay ti biktima iti tallo a nagsusukot a plastic a tugaw ken inusar na ti tali a pinagbekkel.
Manipud ti pannakakita ti caretaker ti nakabitin a biktima ket possible nga agarup maysan nga oras ti napalabas a nagbitin.
Naitaray ti biktima iti Gov. Roque Ablan Sr. Memorial Hospital ditoy siudad ti Laoag ngem naideklara a dead on arrival.
Iti panagtultuloy ti imbestigasyon, inbunannag ni Buenavista nga arig nga agpakpakada ti biktima, maysa nga aldaw sakbay ti panagbekkel na, kas naibasar iti pagayam daytoy.
Inbatad ni Buenavista nga addan ti immuna a gandat a panagpakamatay ti biktima ngem saan a naituloy gapu ta binagbagaan ti pagayam na.
Naamuan pay dagiti otoridad a possible pay nga utang ti kuarta nga umabot ti minilyon a pisos ti nangiduron iti biktima a nagpakamatay.
