LAOAG CITY – Balligi a natiliw ti maysa a babai a wanted person iti ili ti Pasuquin kalpasan ti nasurok maysa a dekada a panaglemmeng na manipud iti linteg.
Ti akusado ket agtawen ti 54, balo, ken residente ti Barangay Nagsanga iti nadakamat nga ili.
Natiliw daytoy babaen ti nagtipon a pwersa ti Provincial Special Enforcement Team, INPPO iti panangidaulo ni Police Captain TOLENTINO F ERUM JR ken Pasuquin MPS babaen iti superbisyon ni PCOL JULIUS C SURIBEN, Provincial Director kasta pay ti PIU-INPPO, INTPU, 101st MC, RMFB1, 144 Special Action Company/14 Special Action Batallion.
Inserbi dagiti otoridad ti Alias Warrant of Arrest a napetsaan ti November 10, 2008, nga inparuk-at ni Hon. Judge Conrado A Ragucos iti RTC, Branch 16 Laoag City gapo iti kaso na nga estafa.
Narekoemendaran met daytoy ti 30 a ribo a pisos a pyansa para iti temporaryo a pannakawa-waya na.
Iti agdama, ti akusado ket adda iti kustudiyar ti PNP-Pasuquin ken manamnama a maipaima iti korte a naggapoan ti warrant of arrest.
