LAOAG CITY – Adda ti sumurok maysa a ribu a pedaso ti Minion memorabilia ti naurnong ti maysa a babai idiay Australia a rason a napadayawan kas Guinness World Record holder iti titulo a “Largest Collection of Minions Memorabilia.”
Immuna nga inpabuya ni Liesl Benecke ti Despicable Me idi 2010 ken insigida a na-obsess kadagiti agmaris ti yellow ken cute a character a Minions.
Manipud iti bassit a figurine, dimmakkel ti koleksion daytoy kadagiti poster, stuff toy, keychain, bado ken pakairamanan ti Minion tattoo iti takiagna.
Gapu iti pannakahiligna iti Minions, nabirngasan isuna iti awag a “Minion Lady” iti opisinada pakairamanan ti lugan ken work desk daytoy ket napnoan ti display a Minions.
Ti paboritona kadagiti Minions ket ni Stuart ken masansanna nga itugtugot iti road trips-na no sadinno a naka-seatbelt pay iti pagtugawan.
Addaan isuna ti Minions manipud kadagiti nagduduma a pagilian kas ti Japan, Italy, Estados Unidos ken Singapore.
Maysa kadagiti ipanpannakkelna ket ti uppat a Swarovski crystal Minions nga ibilangna a kapatgan iti koleksionna.
Naammoan nga uray addaan isunan ti world record, saan pay nga agsardeng daytoy iti panagkolektar gapu ta mangipapaay kenkuana ti naidumduma a ragsak no adda ti baro a Minion a nainayon iti koleksionna.
