LAOAG CITY – Maysa a babai idiay Alberta, Canada ti nakagun-od ti baro a world record iti planking iti baet ti tawenna a 58.
Kinumpirmaran ti records keeping organization a Guinness World Record a ti retired school vice principal a ni DonnaJean Wilde ti baro a world record holder iti titulo a Longest Time in an Abdominal Plank Position (Female).
Daytoy ket kalpasan a nakairekord daytoy ti record time nga uppat nga oras, 30 a minuto ken 11 a segundo.
Naisayangkat ti world record attempt ni Wilde iti high school no sadinno ditoy a dati a nagserbi kas vice principal. Nagatendar ti official adjudicator ti Guinness a ni Tina Shi tapno bantayan ti form ni Wilde iti planking-na.
Iti pagannurotan nga inruar ti Guinness tapno magun-od ti world record, ti takiag ken ramay iti saka ni Wilde ket isu laeng a paset ti bagi ti nakadisso iti datar.
Malaksid iti daytoy, ti sibubukel a bagina ket nasken nga adda iti umiso a form ken saan a mabalin a masagid ti datar.
Nangrugi a nag-planking ni Wilde, 12 a tawenen ti napalabas idi matukkolan ti ramay iti imana. Iti kalikagumna a maka-workout uray adda ti sugatna ket nasursurona ti ag-planking.
Kunana a napintas daytoy nga ar-aramidenna kabayatan nga agbuybuya ti telebision. Daytoy met ti workout-na bayat nga agad-adal daytoy kadagiti readings iti masteral degree-na.
Bayat nga adda isuna ti record attempt, inyestoria ni Wilde nga alisto nga aglabas ti dua nga oras bayat a naka-plank isuna ngem nariknana ti sakit ti bagina iti naudi a simmaruno nga oras. Ti nangipaay kenkuana ti motibasion tapno saan a sumuko ket ti agtawen ti 12 nga apokona nga agbuybuya ken agchi-cheer kenkuana.
Kalpasan a maawat ti Guinness certificate-na, kalikagum ni Wilde nga agbalin nga inspirasion isuna kadagiti tattao a saan nga agbalin lapped ti tawen kadagiti amin a banag nangruna iti physical challenges.
