LAOAG CITY – Kinumpirmaran ti Guinness World Records a ni Lulu Lotus ti Canada ti baro a world record holder ti titulo a “World’s Loudest Nose Whistle.”
Daytoy ket kalpasan a nagsagawisiw iti agongna nga addaan ti kapigsa a 44.1 decibels.
Agtawen ti pito ni Lotus idi maduktalanna ti kabaelanna usar ti agongna.
Idi ubing pay daytoy, masansan daytoy nga agsagawisiw iti klasrumda tapno angawen dagiti kaklasena ken mangisursuro gapu ta awan ti makapugto no naggapoan ken asinno ti nagsagawisiw.
Saan a nagbayag, nasursurona nga agsagawisiw dagiti sikat a kanta. Idi saanna nga iserseryoso ti naidumduma a talentona.
Nupay kasta, idi mabuyana ti documentary nga “I’ll Sleep When I’m Dead”, no sadinno nakaawat daytoy ti Guinness World Record ni DJ Steve Aoki ti titulo a “Most Travelled Musician in One Year,” a na-inspire ni Lotus a mairaman met ti naganna iti Guinness Book of World Records.
Iti record breaking attempt ni Lotus, nagsagawisiw daytoy ti theme song ti pelikula a The Godfather no sadinno dimmanon iti 44.1 decibel ti kapigsa ti panagsagawisiwna. Maipada daytoy ti kapigsa ti uni dagiti tumatayab.
Idi nasaludsod ken ni Lotus no kasanona daytoy nga ar-aramiden, kunana a konkontrolenna ti muscle iti karabukobna.
Nupay natungpalen ni Lotus ti arapaapna a magun-od ti Guinness, manarimaan latta daytoy nga agen-ensayo para iti nasaysayaat a talentona.
