LAOAG CITY – Napagsasaritaan iti online ni Bailey Cormier ti Nashville, Texas kalpasan nga inrakurakna iti online shopping experience daytoy no sadino canned tuna ti naawatna nga imbes a nangina a Dolce & Gabbana ashtray nga isu ti in-order-na.
Iti nasao a bidyu a dimmanonen iti maysa a milyon ti views, inlawlawag ni Cormier a nagaramid laeng isuna ti TikTok account tapno iyestoria ti kapadasanna iti panag-order daytoy iti online store ti sikat ken nangina a department store idiay Estados Unidos ti Saks Fifth Avenue.
Kunana a nangrugi ti amin idi makaawat daytoy ti discount coupon manipod iti Saks Fifth Avenue iti email-na. Nabayagen a pagpanpanunutanna a gumatang ti Dolce & Gabbana porcelain ashtray nga aggatad ti $275 wenno katukad ti P15,800 isu nga idi nakitana ket ipagarupna a daytoyen ti husto a panawen tapno gatangenen daytoy.
Kalpasan ti sumagmamano nga aldaw a panagur-uray, simmangpeten iti pagtaenganda ti in-order-na a nangina nga ashtray no sadino apaman a linuktanna ti parcel, nakitana a sealed pay laeng ti karton ti Dolce & Gabbana isu nga awan ti nagbalin a panagduduana ditoy ngem idi luktanna daytoyen ket nakigtot isuna gapu ta canned tuna ti linaon ti karton.
