LAOAG CITY – Maysa a babai idiay Slovakia a nabirngasan kas real-life Rapunzel ti nakairekord ti baro a world record gapu iti kinaatiddog ti buokna.
Kinumpirmaran ti records keeping organization a Guinness World Records a ti Ukrainian a ni Aliia Nasyrova ti baro a record holder ti titulo a “Longest Hair on a Living Person (female)”.
Daytoy ket kalpasan a ti buokna ket addaan ti kaatiddog a 8 a kadapan ken 5.3 a pulgada.
Naiyam-ammo kas newest record holder ni Nasyrova idi Abril 21 iti Italian TV show a Lo Show dei Record no sadino nakigtot ti live audience ti nasao a tv show gapu ta nataytayag pay ti buok ngem ni Nasyrova iti katayag daytoy a 5 feet ken 4 inches.
Ni Nasyrova ket agtartrabaho kas graphic artist ken no dadduma ket ag-sideline pay isuna kas hair model.
Kunana a maysa a daras iti maysa a lawas laeng nga agsham-shampoo ti buokna. Dumanon iti 30 a minuto ti panangikabilna ti shampoo ken panagbanlaw daytoy ken no ikkanna pay ti conditioner ket dua nga oras ti kasapulanna para iti daytoy.
Maminsan iti makalawasna laeng nga ar-aramiden gapu ta dumanon iti 24 nga oras sakbay a mamagaan ti buokna nangruna no winter season. Saanna met a kayat ti agusar ti hair dryer gapu ta saanna a kayat a maperdi ti buokna.
Naammoan a saanna pay pulos a napadasan ti nagpapukis no sadino ket i-trim-na laeng dagiti split ends tapno agbalin nga healthy daytoy.
Saanna pay kayat ti agpakulay ti buok ken no mabalbalin ket natural ingredients ti us-usarenna iti hair mask ken conditioner.
Kalpasan a naawatna ti Guinness certificate ti kalikagum ni Nasyrova ket agbalin nga inspirasion isuna dagiti tattao nga apresiaren ti bukudda a pintas.
