LAOAG CITY – Maysa a babai idiay Washington, United States of America ti nakagun-od ti baro a Guinness World Record kalpasan a nakasuot daytoy ti 45 a sweater.
Kinumpirmaran ti records keeping organization a Guinness World Records a ti agtutubo a ni Sophia Hayden ti baro a world record holder ti titulo a “Most Sweaters Worn at Once.”
Daytoy ket kalpasan a nasuotna ti agsusukot nga 45 a pedaso ti sweater.
Ti previous record holder daytoy ket maysa nga agtawen ti 11 nga ubing a lalaki idiay France a ni Thomas Hocquet-Umambo nga addaan ti record nga 40 a sweater.
Ti pagannurotan nga inparuk-at ti Guinness, nasken a saggaysa daytoy a maisuot ni Hayden dagiti sweater ken ken rumbeng nga umabot daytoy agingga iti siketna.
Maysa kadagiti pagalagadan ket saan a mabalin a mapigis ti lupot dagiti sweater. Ti adda ti pigisna ket saan a maibilang iti rekord.
Ni Hayden ket naggapu iti pamilia dagiti Guinness World Record holders isu a napanunotanna a maaddaan ti bukudna a world record.
Kuna ni Hayden, saan a ti mismo a panagsuot ken panagsusukot ti sweater ti nagbalin a challenge kadakuada tapno magun-od ti world record.
Ti panangbirok ti 45 a sweater nga umanay kenkuana nga aggigiddan a maisuot manipod kadagiti nagduduma a merkado ti nagparigat kenkuana.
