LAOAG CITY – Natay ti maysa a babai kalpasan a nagbekkel iti family house da iti Barangay Callaguip iti ili ti Paoay.
Daytoy ti kinumpirmaran ni Police Capt. Eddie Suyat, ti chief of police iti ili ti Paoay.
Segun ken ni Suyat, napan nagreport iti opisina da ni Rodrigo Galapia mainaig iti panagpakamatay ti ina na a ni Susan Galapia.
Inbaga na a basar iti palawag ti ubing a Galapia, iti panagawid ti ama na a ni Efren Galapia manipod iti taltalon ket nakigtot gapu ta nasangpetan na ti asawa na a nakabitin babaen ti panagusar na ti tela.
Kuna ni Suyat, iti imbestigasyon da ket nagbatay iti monoblock
a tugaw ti biktima ken ingalot na ti lupot iti 2×2 a tubo nga isu ti nangibitinan na ti bagi na.
Inpakaammo ti opisyal nga iti panagdamdamag da iti pamilya ti biktima, naamoan da a ti ina a Galapia ket adda ti problema iti mental health na ken uppat a tawenen nga agtumtumar ti agas.
Innayon ni Suyat a possible a saanen a kinabaelan ti biktima ti problema iti mental health na isut gapuna a napanunut nan ti nagpakamatay.
Naitaray pay laeng ti biktima iti Mariano Marcos Memorial Hospital and Medical Center iti ciudad ti Batac ngem naideklara a dead on arrival.
Inpasingked ni Suyat nga awan ti nakita da a foul play iti pannakatay ti nasao a biktima.
