LAOAG CITY – Kinumpirmaran ni Police Lt. Jimmy Aganon, ti deputy chief of police iti ili ti Pasuquin ti panagpakamatay ti maysa a babai babaen ti panagbekkel na iti Brgy. Susugaen ti nasao nga ili.
Binigbig na ti biktima a ni Isabel Balmores Faylano, agtawen ti 44, naasawaan, addaan ti tianggi ken residente met laeng iti nasao a barangay.
Inbaga ni Aganon a basar iti asawa ti biktima a ni Erwin Faylano, kabayatan ti panagin-inana na manipod iti trabaho na ket simmangpet ti anak na ket sinaludsud na no ayan ti ina na.
Sinapol da ti biktima iti uneg ti balay da ngem awan daytoy isut gapuna a napan da iti bodega da ngem nakalock.
Gapu iti daytoy, napanda innala ti tulbek ti bodega ken iti panangilukat da ket ditoyen a naduktalan da a nakabitin ti asawa na usar ti tali.
Inbaga ni Aganon a patien ti asawa ti biktima ken dagiti kabagyan da a possible a depresyon ti makaigapu ti panagpakamatay ti biktima gapu kadagiti maipagarop nga ado nga utang na ken adda ti sakit na nga highblood no sadinno nga agmen-maintenance daytoy.
Naamoan da Aganon a saan laeng a maymaysa a tao ti nakautangan ti biktima.
Mabalin a napressure unay ti biktima gapu iti kaado dagiti utang na ken kanayun ti papan panagsingir dagiti nakautangan na.
