LAOAG CITY – Inbatad ni Police Capt. Kristoffer King Ramos, ti chief of police iti ili ti Piddig nga adda ti inarestar da a maysa a babai gapu iti saanna a panangrespeto kadakuada a pannakabagi ti linteg kabayatan ti panangipatungpal da kadagiti pagalagadan iti pannakaipatungpal ti Enhanced Community Quarantine iti intero a Luzon gapu iti covid-19.
Binigbig na daytoy a ni Romana Castillo y Lanillo, agtawen ti 52, residente ti Brgy 3, Loing iti nasao nga ili.
Inlawlawag ni Ramos a napan ni Castillo iti tiendaan iti ili ti Piddig nga awan ti pass slip na a kangrunaan kasapulan nga ipakita dagiti mapan iti sentro no adda ti mapan da gatangen a kasapulan da gapu iti maipatpatungpal nga Enhance Community Quarantine gapu iti coronavirus.
Nupay kasta, kuna ni Ramos nga idi damagen dagiti kakadwa na ti pass slip ni Castillo ket maipagarop a saan a napintas ti pinagsungsungbat na ken nagbalin nga arogante kadagiti otoridad.
Innayon na nga inpetteng pay ni Castillo ti “AWAN PULIS PULIS KANIAK! AGINGGA NA KAYO LAENG DITA, PWE! ANIA A COVID COVID DAYTA IBAGBAGAYO”
Gapu iti daytoy, inarestar dagiti pulis ni Castillo ken pinilaan da ti panaglabsing iti Article 151 ti Revised Penal Code wenno ti Resistance and Disobedience to a person in Authority.