LAOAG CITY – Inpetteng ti maysa a babai a pinaglabos isuna ti x-ray technician iti Laoag City General Hospital (LCGH) idi napan nagpa-xray.
Segun kenkuana, idi nakabayaden ket pinaikkat ni Mr. John Lester Medrano amin a bado ti saanen a nagpainagan a babai ken saan na a pinasuot ti hospital gown sakbay a na-xray.
Inbatad na nga idi naikkat nan ti t-shirt ken bra na ket simrek ni Medrano ngem maipagarop a pinaikkat na pay ti tube ti babai.
Kunana a namin-dua a daras a dinamag na ni Medrano no apay a rumbeng a maikkat amin dagiti akin-ngato nga arwaten na, ken ti laeng sungbat na ket masapol nga awan ti bado na.
Inlawlawag na a kalpasan daytoy ket iniggaman ti xray technician ti babai ken ditoy a naiyuswat ti x-ray procedure.
Innayon na a kalpasan ti panag-xray na ket dagus a rimwar iti xray room gapo iti nakaro a panagbuteng na.
Kabayatanna, naiget a naglikudan ni Medrano, ti xray technician ti Laoag City General Hospital (LCGH) ti alegasyon kenkuana ti babai.
Daytoy ket pakaseknan a na-xray ti babai kalpasan a maipagarop a pinaikkat ni Medrano dagit akin-ngato a suot ti babai.
Inpetteng ni Medrano nga idi simrek iti nagsukatan ti babai ket nakita na a nakaluban ti barukong na usar dagit ima na ti babai.
Segun kenni Medrano, ti iniggaman na a parte ti bagi ti babai ket ti takyag na idi maiyuswat ti panag-xray.
Kunana a no mapaneknekan nga adda ti basol na ket nakasagana nga agsungbat.
Kabayatanna, inbatad ni Dr. Marsha Wapan a maiwayat da ti imbestigasyon seknan iti pasamak.
Inbatad na a ni Dr. Francis Dacuycuy ti makaammo no anya a pannusa ti maipataw kenni Medrano no mapaneknekan a nagbasol.
