LAOAG CITY – Maysa manen a babai ti nagbalin a biktima ti budol-budol gang ditoy ciudad ti Laoag.
Nabigbig ti biktima a ni Hazel Quibuyan, agtawen ti 33, awanan ti asawa ken residente ti Barangay 12 iti ili ti San Nicolas.
Segun ti report, bayat ti kaadda ni Quibuyan ti batog ti maysa a bangko ti Barangay 15 ditoy ciudad ti Laoag ken agbirbiruk ti marentaan ti marentaan a truck ket inasitgan ti maysa a lalaki ken maysa a babai.
Gapu ti daytoy, nagturong dagiti tallo ti M. H. del Pilar St. gapu ta maipagarop nga isu ti ayan ti ammo dagiti suspek a marentaan a truck.
Bayat ti kaadda da ti lugar ket nakisarita ti suspek a lalaki nga ikabil na pay laeng iti pouch ti biktima ti kwarta na a 3 ribo a pisos, cellphone ken dadduma pay a gadgets.
Nupay kasta, idi insublin ti suspek ti pouch na ket kinita na a dagus ti uneg ken ditoy a naduktalan na nga awanen dagiti karga na.
Dagus met a nagtalapwagaw ti lalaki idinto a nagammatan ti biktima ti suspek a babai a nabigbig ti nagan na nga Amy Reyes, agtawen ti 55, balo, ken taga Barangay Danao, Cebu.
Iti agdama, nagtalinaed ti kustodyar ti PNP ni Reyes.
