LAOAG CITY – Maysa nga agtawen ti 48 a babai idiay Poland ti nakagun-od ti baro a rekord kalpasan a nagpaot ti tallo nga oras kabayatan a nakaupor iti yelo.
Pinasingkedan ti Guinness World Records a ni Katarzyna Jacubowska ti baro a record holder ti titulo a “Longest Duration Full Body Contact with Ice for Female” kalpasan a nagpaot iti uneg ti tallo nga oras, innem a minuto ken 46 a segundo iti glass aquarium a napno iti yelo.
Sakbay a napasamak ti panangpadas ni Jacubowska, immuna a nangipasa iti sumagmamano a medikal a panagsukimat tapno masigurado a ti panangbasa iti bagina iti yelo ket saan nga apektaran ti salun-atna.
Namitlo met ti panangpadasna iti panagensayo a mangmonitor iti panagbalbaliw ti temperatura ti bagina.
Malaksid kadagitoy, nagpasar pay iti hyperbaric oxygen therapy ken self-hypnosis tapno makapagsagana met ti mentalidadna iti karit iti yelo.
Inbatad ni Jacubowski, inaramidna daytoy tapno ipakitana a kabaelan met dagiti babbai dagiti karit iti yelo.
Gagangay dagitoy a kita ti pasalip a mainaig iti yelo idiay Poland kabayatan iti panawen ti kinalamiis ngem manmano a makipaset dagiti babbai.
Segun kenkuana, kayatna pay laeng a buraken ti adu a rekord iti lubong a mainaig iti lamiis ken yelo.
